手機用戶請按此放大圖表
北京改特首選舉同立法會選舉辦法，以後建制派基本上玩晒，之前前特首梁振英對住外媒打晒開口牌想再出山，今次就到早前成功將《星島日報》賣盤畀內房資本嘅全國政協常委何柱國，仲講明特首林鄭月娥爭連任，佢一定考慮出嚟選挑機，因為佢想同777辯論下，究竟777係破壞多定建設多。
政圈一直盛傳炒何同777不和，炒何噚日接受無綫訪問，公開話考慮選特首，但佢講明唔係想要贏，而係想同777辯論，點解炒何咁想同777辯論？原來777當日講過一句說話，佢話自己「建設多過破壞」，炒何講明，佢對呢句說話有啲唔同睇法，所以就係想搵個機會同777辯論，仲好寸咁話：「我想睇吓佢建設咗啲乜嘢。」至於777任內破壞咗乜？炒何就唔肯講明，只係話：「所以我哋大家辯論囉！」
除咗講參選，炒何都有撐北京「完善」香港選舉制度，話商界力量唔會因日後特首選舉委員會再加300人到1,500人而攤薄，因唔少政協都係從商，又撐立會加40席選委議席都有廣泛代表性，仲話唔好睇政協嗰啲人全部會跟住中央政府、或者跟住特區政府投票、因為每人都有每個人嘅理念喎！但八方就唔信，有政協會唔聽西環講！
李八方