香港電台拍香港故事，講古吹水，竟然唔准講「香港病了」。四隻字與成輯古仔，被DQ，取而代之的是「疫行者」。
有病，聽專家講，淺中醫囉。睇病唔到，電台高層以為自己時運高所以紮職，升上神枱的人是絕對冇可能睇到鬼與病這些污糟邋遢嘢嘛，新年流流開口講「香港病了」，邪住風水囉。所以病改為疫。小病是福，肺疫令全世界仆，香港電台宣揚疫行，老友記以為就算三高心臟弱過水煲，都能夠與疫苗安心出行，等住通關返大灣區食海底撈。唔怪得由去年佛堂群組到跳老舞群組，以至最近的K11仍在爆，長者卻無有怕。長輩圖反駁「香港病了」，啋過佢，猛話國家唔會害香港人，唔理三七廿一堅持打科興，力證自己不是假忠誠的老廢物。愛國廢人，喔，不，老人，以老身相殉，打死罷就，為政府獻出白老鼠第一次，好心做烈士。香港故事，去到今日這一程，讓我想起剛剛在西環高先戲院看《好好拍電影》，許鞍華說覺得呢度好多古仔，好commit to呢個地方，好想做啲嘢。好好講故事，愛國者治港下，對家幾時會拍「好好愛廢物」，取代剪晒片都唔敢上由林青霞蕭芳芳擔正的「好好打科興」？