今日講一單億元成交嘅刁係點傾返嚟。
某日在街撞見認識多時的金融夫婦，閒聊講到他們想拓展業務，問我拎觀塘新盤資料。見面時，金融夫話：「公司盤數我老婆睇，計緊數睇吓買唔買得起。」金融妻接着說：「計得到條數都要睇吓老闆鍾唔鍾意。」我當時心裏說了一個字，因為她所謂的老闆是她老公。
關係不會因為一次商談沒結果而中斷，保持與金融夫吹水，講到名車，他非常興奮，並炫耀自己剛買入兩部名貴跑車。那刻，機會來了，我搵一家相熟發展商取了其觀塘全新商廈最低層單位連3個獨立車位的代理。翌日再約他們食飯，金融妻坐低即問：「係咪劈價？」 我答：「價錢真係冇可能會調整，但呢幢最近地鐵站，遲一年買可能下一條街。今日買，我搶最低層最近升降機3個獨立車位畀你，遲一年，可能3樓4樓。」
金融夫一聽有共鳴，叫我到他辦公室收票，購入半層物業連3個車位！票已出，翌日金融夫婦踩上我公司，我同佢哋講：「老闆你哋都買咗大半層，爭3個單位就全層，到時同發展商傾用埋條走廊，條走廊成千呎，接近一個單位嘅面積。」金融夫婦最後買埋同層3個單位，過億元成交就咁傾返嚟。
呢單刁絕大部份係運，但我覺得交易係睇客人要乜。
小師兄