新聞主播說「栗政司」要確保愛國者治港，着人大打出「法律組合拳」打擊港獨。這套組合拳來得跟科興一樣及時。人大組合拳，三秒KO不同政見，法律組合拳，勢推中共上法治國際擂台，拎硬金腰帶。說「中國人梗係支持中國，盡自己責任，幫國家試呢隻疫苗」的香港預約者，忠誠報國之心跳，加快悸動。Cut針？不，冒着滅活炮火前進依約去官涌接種的死士，你當人家流嘅咩？人哋好烈士咁話「唔怕打針死，只怕冇打針會死」，義和拳上身，硬撼唔閃！硬食唔怯！
科興出事，撞啱「栗政司」出拳，打針打拳，都死得人。暫時針還有得揀，拳就人大隨機組合。兩會晒冷，拍掌者裏頭有幾多%針咗科興，幾多%國藥，如何影響法律組合拳的力度，有待專家肛拭子檢測。愛國是政治，數據是科學。兩會有位福建幫擦國安法鞋，說市民留言指年初二車公求簽遠比不上國安法呢支護佑香港平安的上上簽。這樣啊，法律是組合拳，國安法是上上簽，科興是烈士紀念碑；老董一仆救國，鄭市長用現金出糧是打擊洗黑錢，栗政司無窮覆核上訴呢，睇架勢似係兔子蹬鷹、鯉魚打挺、就地十八滾的組合！