求驗客手記:亞洲最佳20人冇中國份 玻璃心又碎

求驗客手記:亞洲最佳20人冇中國份 玻璃心又碎

近年提到亞洲足球強國,相信大部份人都係諗起日、韓,之後就係西亞國家,有排都未到中國,但係強國不嬲都係唔同思維嘅。英國足球網站90min早前選出亞洲史上最佳20名嘅球員,日、韓一共佔咗12人,但就一個中國球員名都見唔到,搞到強國玻璃心又碎到一地都係。

根據90min嘅排名,亞洲歷來最佳球員就係南韓嘅車範根,呢位現年67歲嘅名將曾經喺上世紀80年代幫德甲嘅法蘭克福同利華古遜贏到歐洲足協盃冠軍,成就確實好高。之後第二位就係上世紀初效力巴塞隆拿,上陣357場射入369球嘅菲律賓前鋒保連奴艾簡達拿,第三名就係大家熟識嘅孫興民啦。

■南韓嘅車範根(右)曾經贏過兩次歐洲足協盃,亞洲第一當之無愧。

其實呢個排名就咁睇都相當正路,但中國球迷對冇中國球員入選相當不滿,有人就話:「亞洲球王李惠堂都冇?阿里戴伊先排第11,個編輯擺明就係韓國人啦。」更有人話應該禁止90min報道中國足球資訊。不過老老實實,上古時代嘅李惠堂根本就冇喺國際舞台真係有過特別表現,就算講近代出名嘅孫繼海、李鐵等等,比起排第20位、以主力身份贏過英超冠軍嘅岡崎慎司,成就都爭唔止一皮,強國球迷都係留喺牆內睇「廣州恒久遠大」好過啦。

■中國球員孫繼海(左)雖然踢過曼城,但冇咩成就可言。