BioNTech復必泰疫苗在香港開打,芸芸首輪接種人士中,知名者除了袁國勇外,還有曾蔭權。這位鮮少露面的前特首,日前身穿藍色恤衫,手戴勞力士,到中山紀念公園體育館接種復必泰,事後還展示接種紀錄給記者拍照 。
翻遍各大報章,都沒見他像林青霞,或其他接種科興的愛國者一樣,聲稱「好開心」,於是我馬上跟藍絲朋友說:「都話識得打,梗係打科興啦!你睇隻復必泰,打完個人都冇開心到嘅。」那藍人居然答:「你講呢啲冇用,我係講事實。睇數據,科興保護率喺50%浮動,復必泰就90幾,咁我梗係打隻勁㗎喇。」
我說:「保護率高啲,副作用又大啲喎。」藍人說:「喂阿哥,你日日寫『係人都會死㗎啦』,打針死好過唔打針死,生死有命,隨緣囉。」我沉默片刻,終於想到這樣反駁:「愛國者嘅標準係尊重自己民族。你唔打科興,係咪唔尊重中國先?」
藍人答:「如果打復必泰就係唔尊重自己民族,咁特區政府做乜要買呀?林鄭豈不是俾機會市民唔尊重中國,咁你叫大公、文匯批鬥咗林鄭煽動仇恨同顛覆政權先啦!」我投降。請各位作見證:我已經盡晒力,但依然無法說服所有藍人去打科興,唉。
歷年四個特首,除了曾蔭權,其餘都似乎特別尊重自己民族。科興說明書不建議60歲以上長者接種,數據亦顯示保護率不高,偏偏還是有老人前仆後繼打科興,除了政治表態,我也想不出是什麼用心。針係自己揀,仆街唔好喊——當然,董建華真係仆咗,但唔通又關科興事咩?
曾蔭權任特首那幾年,最多港人認同自己是中國人,中港關係也最和諧。貌似欠缺黨性的曾蔭權,即使未必令港人滿意,但至少是對共產黨最有利的。那時港人整天在喊「地產霸權」,只有鬥地主而沒有抗共。以事論事,煲呔曾確是相對上最「賢能」的特首,但最倒楣的也是他。
坐監未必令曾蔭權的人生更精彩,但似乎令今天的他更自由。至少他不必烚熟狗頭,去打支「一係得,一係唔得」嘅針,完事後還要大叫「我好興奮呀」,也是不幸中之大幸。