民政事務局局長徐英偉一向鍾意玩facebook，試過喺油麻地大火期間分享食糖水相片，當網民留言質疑時居然引戰，話自己「Multi-tasking」。呢股戰狼風吹到民政局fb小編，因為一次電車活動，同中西區區議員葉錦龍嚟一場罵戰。
事緣徐英偉前日出席香港電車公眾免費乘車日活動，15個「白衣人」企埋一齊拉起橫額打卡影相，仲喺城西道馬路電車路上鋪紅地毯做揭幕儀式。又唔使俾人票控599G，又唔使上返行人路，雙重標準惹嚟中西區區議會石塘咀選區議員葉錦龍不滿。佢喺民政局fb留言質疑，點解局長又群聚又發表政治就得，但其他人喺高等法院排隊聽審，揸住張籌都俾PoPo告違限聚令？
結果民政局喺留言答，話徐英偉應邀出席，活動只接受獲邀請嘉賓出席，活動地點唔屬於公眾地方所以無違反限聚令。葉錦龍就貼埋張圖反問「嗰個位電車路嚟喎局長」，市民都好想知點解唔係公眾地方。不過fb編輯就冇再回應。有人就心水清，官話唔係公眾地方，咪唔係囉！
李八方
