上周末重心燕豪芬勝[-1]，冇令大家失望，呢排荷蘭波OK就繼續，不過周中冇荷甲，搵嚟歐霸盃有荷甲球隊嘅戲碼，荷甲1哥阿積士（圖）16強首回合主場對年青人，繼續信佢哋呢排攻得又失得作風，入球「大」啦。
阿積士周日3:1輕取格羅寧根，荷甲繼續領放，相信有信心爭埋歐霸盃，連埋荷甲、荷蘭盃，拎三料冠軍都幾過癮。雖然因為註冊問題，新加盟前鋒施巴斯坦賀拿踢唔到歐霸盃，賀拿雖然加盟兩個零月，已經入成六粒波，不過其實佢呢啲高大中鋒踢法，反而搞到阿積士進攻時中路塞車，佢哋最煞食係杜辛泰迪治、安東尼馬菲奧斯等小組互傳入楔，又快又多變化，所以賀拿缺陣歐霸盃，對阿積士影響唔算大。
反而最擔心係一號門將奧拿拿，因為禁藥問題停賽一年，呢排球隊被迫用番史基倫堡，大家冇聽錯，係38歲踢過羅馬同富咸嗰位老將，近期睇番阿積士比賽先知佢原來仲未收山。呢位老人家身手就一定冇奧拿拿咁好，搞到阿積士近6場有5場失波，今次都好難保清白身，攻強守弱，一於要「大」啦。
嚟自瑞士嘅年青人，上圈已經爆冷淘汰德甲前列嘅利華古遜，2回合入到6粒，前鋒殺手施爾巴特捷奧包辦三球，真係唔講得笑，加上瑞士超已經拋離成條街，可以專心歐霸盃，作客荷蘭都唔會主守，呢場入波多，求分頭可以揀個冷啲嘅[3.5球]「大」。
星期三就有場西甲補賽，馬德里體會對畢爾包，馬體會上場首都打吡慘被皇馬完場前逼和，榜首位置畀巴塞力追緊，呢場波真係要好小心。畢爾包近期防守唔錯，近8場未試過單場失多過1球，馬體會都好難大炒，揀個入球「細」穩陣。
文：Goal進
截稿前馬會尚未開盤，盤口僅供參考，讀者記得留意足智彩網頁。