美斯同基斯坦奴朗拿度（C朗）呢兩大球王，嚟緊周中就要喺歐聯16強次回合生死戰分途出擊，佢哋啱啱就分別協助巴塞隆拿同祖雲達斯喺本土聯賽贏波，壯吓聲威先。
巴塞之前喺歐聯16強首回合，主場以1:4慘敗喺巴黎聖日耳門（PSG）腳下，晉級形勢唔多樂觀，雖然禮拜三就要作客再鬥PSG，但佢哋喺上周六場西甲並冇因為咁收起主將美斯，仲憑着佢交出兩次助攻，造就佐迪艾巴同18歲小將摩列巴各入1球，最終以2:0擊敗奧沙辛拿，聯賽保持16場不敗兼作客8連勝，繼續向榜首嘅馬德里體育會施壓（未計周日戰果）。
另一邊廂，祖雲達斯就憑住拉比奧特嘅入球，加上艾華路莫拉達起孖，喺意甲主場以3:1反勝拉素。由於祖記喺歐聯16強首回合，意外以1:2輸咗畀波圖，所以教練派路今場就一早同C朗講掂數，到最後20分鐘左右先放佢後備出場，等佢唞夠周二再同波圖搏命。C朗賽後亦喺ig用意大利文出咗兩個限時動態，話喺星期二場歐聯再見，仲表明戰鬥到底，睇嚟佢真係好有信心，可以喺主場反勝波圖打入八強。