【名家足路】
【對決場次︰奧沙辛拿vs巴塞隆拿】
踏入2021年後筆者運勢轉順，2月更加幾乎係貼乜中乜，終於擺脫兩次燈神之名，今季第一次成為台主，亦首次可以喺《一燈決》呢個欄目上，用一哥嘅身份推介心水畀讀者。講真，論貼波經驗筆者當然唔及已縱橫賭壇多年嘅牽牛，但初生之犢不畏虎，今個禮拜筆者正正推介只係升班第二季嘅奧沙辛拿，有能力逼和甚至打低巴塞隆拿呢隻大老虎。
可能會有人話，近排巴塞同美斯都好鬼「弗」喎，呢個時候點敢同佢作對啊？但其實巴塞今場有唔少隱憂囉！首先佢哋喺周中先同西維爾喺西班盃4強踢足120分鐘，先至喺加時搞掂對手，體力消耗好大，美斯同佐迪艾巴仲要踢足全場，今仗仲有冇力跑都成問題，加上下星期佢哋就要作客巴黎聖日耳門，踢歐聯16強次回合大戰博翻身出戰，畀你係美斯都留力踢歐聯啦。
可能好記性嘅球迷都會記得，唔係喎！兩隊首循環嗰陣巴塞喺主場炒過奧沙辛拿四蛋，但個場其實係馬勒當拿過身後首場巴塞嘅比賽，最鐘意揀波踢嘅美斯哭喪波當然着晒火，事實上奧沙辛拿上季兩循環鬥巴塞，取得1勝1和嘅佳績！而且奧沙辛拿近期狀態都好弗，近4場波贏足3場，但其實距離降班區只係差六分，相信佢哋今仗面對兵疲兼有歐聯後顧之憂嘅巴塞，肯定希望喺主場反抗搶分，絕對有能力逼和對手，甚至打低埋有時會失準嘅巴塞，今仗巴塞作客要讓一球，識揀梗係捧下盤！
文：尊嘉
《一燈決》係今季新欄目，由上月擂台盟主同上月燈神拗吓頸，睇吓讀者信邊個。