國際米蘭禮拜四喺意甲作客帕爾馬，結果憑住正選嘅智利前鋒阿歷斯山齊士梅開二度，以2:1險勝對手，賽後國際以25戰得59分，領先日前失分、排喺次席嘅AC米蘭六分，繼續喺聯賽榜領放。賽後山齊士就話自己好似一隻被困籠中嘅獅子：「我係一位經驗豐富嘅球員，教練信任我令我好高興。我感覺自己就好似一隻困喺籠中嘅獅子，當我踢得越多我就感覺越好。」