隔牆有耳:建制偷懶 預算案提問減半「橡皮圖章」「忠誠廢物」認證(李八方)

隔牆有耳:建制偷懶 預算案提問減半
「橡皮圖章」「忠誠廢物」認證(李八方)

當日民主派總辭,建制派話自己一樣可以監察政府,之後發生一堆甩轆、唔熟開會規程嘢已經見晒報,八方唔使多講,之前財爺陳茂波公佈預算案,民意反應差,建制派大舉理應提出預算案問題,以示「做到嘢」,點知今年議員對預算案提問大縮水,少接近一半。

𠵱家立會民主派議員全面缺席,財委會下個月將審議《財政預算案》,按慣例議員會先提出大堆書面問題,咁剩返42名現任議員,又合共提出幾多條問題?答案係3,249條提問,比上年預算案嘅6,804條少近一半。

鼠王芬唔夠泰博多

咁又係邊個提出最多問題?原來又唔係建制派,而係熱血公民鄭松泰,佢共提出250條問題,不過都比過去幾年提出約1,000條問題稱冠嘅工黨張超雄,少咗逾七成。

咁建制派邊個提最多問題?就係繼泰博之後排第二嘅梁美芬,佢提出185條問題,之後排第三為醫學界陳沛然,之後先係馬逢國同民建聯柯創盛。

根據財委會主席陳健波提供嘅資料,過去五年議員就預算案提出問題數目維持係6,000至7,000條左右,過去四年提出最多書面問題嘅頭五名議員都係民主派議員。北京航空航天大學法學院副教授、全國港澳研究會理事田飛龍剛剛先寫文話,北京搞愛國者治港,踢走民主派,但同樣唔係要「橡皮圖章或忠誠的廢物」,而係「賢能的愛國者」,建制派咁嘅表現,唔知北京收唔收貨?

李八方