港股近日走勢之飄忽實在罕見，前日見陰陽燭出現利好訊號，嘗試入場買些少貨，昨日即告損手離場。先行離場，保住今年利潤為上策。無trade好做，不妨整理一下思緒。宏觀面去睇，雖然全球疫情有降溫迹象，但經濟復蘇仍然脆弱，環球央行短期仍將繼續放水，炒通脹將是今年的大主題。投資主軸不同，操作上亦與去年大有分別：今年舊經濟買來揸，科網、醫藥股則短線炒上落。
呢幾日收到不少戰友inbox，指高位買入SaaS股、手機硬件股中伏，問可否堅守等下一個春天？其實論增長前景，魏力仍然看好，呢類股目前的隱憂不在於增長，而在於極為高昂的估值。隨着美國十年期債息回升至1.5厘附近，經濟復蘇又見曙光，再用100倍市銷率（PS）買隻SaaS股，定係5倍PE買隻銀行股？聰明錢自然是沽前者獲利，再用利潤去博後者。
呢轉跌浪一路都是殺估值，而不是擔心增長放緩，如拉遠至未來3年去睇，科技醫療股即使是買貴，但也不是買錯了，本身是中長線投資的話，捱住先也無妨，但如果買入目的是短炒，就千萬不要短炒變長揸，因為最終只會在更低位（甚至最低位）認輸離場。
魏力