周四英超快車，2連勝的愛華頓作客尾2的西布朗。愛華頓乘早前擊敗死敵利物浦的氣勢，上輪一球小勝修咸頓，仍有希望爭入前四。「拖肥」今季作客成績比主場醒神，雖然西布朗近期狀態回升，但相信難阻愛華頓全取三分，讓半/一捧上盤。（球賽編號：星期四3；now622台明日2:00am直播）
愛華頓上輪主場迎戰近期狀態低沉的修咸頓，靠李察利臣（圖）早段入球一箭定江山贏波，現時手執43分，只差第4位韋斯咸2分，爭取來屆歐聯席位依然有希望。
雖然今季拖肥狀態難稱穩定，但球隊作客表現出色，至今12場客場聯賽僅輸2場，而且自從去年11月後作客未輸過，當中包括逼和曼聯及擊敗利物浦。再者，今仗球隊可望迎來隊長史密斯高文及中場大腦占士洛迪古斯傷癒復出，實力有望再提升。
西布朗近期狀態提升，上輪靠中堅基爾巴特利一球奠勝擊敗白禮頓，取得艾拿迪斯執掌後的第二場聯賽勝仗。不過，比賽中白禮頓兩次12碼「宴客」，加上球證「彈弓手」判李維士鄧克的罰球快射無效，西布朗全取三分實屬夠運。西布朗實力難有本錢贏波，面對近況不俗的拖肥相信難逃一敗。
文：亨少