別看專欄多年前被毛尖女士掛上「天天都黃」橫匾，便以為欄主是色情專家，其實非常慚愧，所謂鹹中自有鹹中手，五湖四海的朋友高人數之不盡，多P性虐金浴露出等等不倫項目樣樣啱，又孤寒又驚青的我深圳沒有叫過鴨曼谷沒有欣賞過fxxk fxxk show，連坐亞望冠資格也沒有，大概只能勉強擠在排行榜尾巴叨陪末座。譬如Q（化名）就犀利過我多多聲，身體力行的輝煌事蹟按下不表，單單對時事新聞的敏銳也夠我羨慕嫉妒恨，任何與男色有關的消息他都不放過，眼睛頻頻吃豆腐，連毛帶屎大小通殺，呢嗱，美國競選總統嗰幾個月，拜登之子不是日以繼夜被爆醜聞嗎，那些大件夾抵食的香腸圖他看得津津有味，違反貼圖者旨在令人反胃的原意不特已，還眉飛色舞向我推薦：「嘩，條友真係勁到吖，就算我本來諗住投特朗普，睇在未來太子巨根份上，都即刻轉軚投佢老竇。」
這兩天獵人勾大嫂之餘順手勾埋大嫂親生家姐傳得沸沸揚揚，雖然缺少現場片段提供視覺娛樂，Q一樣心往神馳，罔顧我獨沽一味只對亞男起痰，晨早發來短訊尖叫：「個衰佬，賤到送自己條底褲畀人，唔使審梗係沾滿DNA嗰隻啦，引死人冇命賠呀，唔制呀，我又要呀！」春心蕩漾猶如玉門關初開少女，真係頂佢唔順，忍不住潑冷水：「喂阿Q伯，你咪向來自認好有品味嘅，英國《每日郵報》登啲嘢你都信？Fact check過未㗎？」他一時語塞，我見機會難逢，於是繼續落毒：「你睇真啲啦，佢幾時話過送自己底褲，買條維多利亞秘密畀對方似啲噃，閣下日有所思夜有所夢，羞唔羞家呀？」