吳孟達是1973年無綫第三期藝員訓練班畢業，作為娘家的無綫昨晚推出特備節目悼念，出席的有田啟文、王晶、苑瓊丹、吳麗珠 、鄧英敏及林子聰等。現場問田雞有否再跟周星馳聯絡談及達哥後事時他說：「我冇再搵佢，佢都冇打畀我，有時間再認真商量吓，睇佢有乜提議，個個話想做，唔知有乜想做，呢件唔係開心事，畀時間大家冷靜吓、畀佢屋企人唞吓。」苑仔受訪時表示從達哥身上學懂跟他人互相尊重：「我同佢合作一套戲，但導演有好多唔同要求，我聽到反應：『唔係呀！』但達哥就好平靜叫我同佢一齊試畀導演睇，仲用四両撥千斤、好平靜嘅情況去表達自己嘅想法。」而林子聰則指達哥似爸爸，當年拍《美人魚》時星爺曾叫他聯絡達哥，有一角想找他演出，奈何達哥當時要做心臟手術而告吹。
此外，無綫前日在fb貼出一條名為「大台寶藏」的片段悼念，當中輯錄達哥由訓練班到《歡樂今宵》及其他劇集的演出，當中有他與周潤發，盧海鵬及鄧英敏一起演出《民間傳奇》。但《蘋果》卻發現片中出錯，把達哥於1976年演出講述香港被日軍佔的《三年零八個月》，搞錯為時裝劇《風雲》；之後又把達哥與林子祥和蘇杏璇演出的《風雲》搞錯成《生命之旅》，遲遲未有更正，認真肉酸。
