講完泰博、曾國衞兩個被網民笑完唔知「黃轉藍」定「藍轉黃」後，原來仲有人被網民笑「黃轉藍」，主角係立法會議員兼行會成員葉劉淑儀。話說劉利群獲升任食衞局常秘後，左報口誅筆伐，指摘佢長期放任「黑暴文宣」，仲株連埋佢老公。葉劉喺fb搶先表態，呼籲停止文革式批鬥。葉劉大義凜然維護AO體制，換嚟大批藍絲留言炮轟，仲狠過鬧黃絲。
相比其他帖文，葉劉疾呼「請停止文革式批鬥」得like少、嬲數多，留言亦一面倒，有藍絲留言叫葉劉「唔好自欺欺人」，因為「群眾的眼光是雪亮的」，食環署嘅表現僅比香港電台好啲，又話文宣拆得慢並非偶然事件。有人炮轟葉劉唔應該話人「批鬥」，市民只係「批評」，又質疑葉劉點解法輪功多年擺大型街站，食環都唔處理？
葉劉一日內「藍轉黃」，亦成為黃圈話題，八方老友就笑言，啲保皇黨成日以為鬥死完反對派自己就有安樂茶飯，鬥剩自己時就發現原來自己就係下一批被鬥嘅餘孽。歷史早有教訓，文革之風易起難收，鬥人者終被鬥。俾呢股「新文革風」吹一吹，唔知葉劉認清自己「支持者」屬邊一類人未呢？
李八方