外號「小豬」嘅台灣歌手羅志祥，上年被前女友周揚青爆佢真面目，話佢私生活混亂仲經常玩「多人運動」，有時玩到深夜4、5點都唔瞓，但又可以如常工作，結果被兩岸三地網民封佢為「時間管理大師」。熱刺球星迪利阿里或者要向呢位歌手請教吓喇，皆因佢最近都俾模特兒女友Ruby Mae狠飛，但就同羅志祥偷食嘅情況唔同。對方同佢分手嘅理由，係怪佢成日掛住打機而冇時間陪自己，控訴佢管理自己嘅時間不善喎。
英國《太陽報》上周六爆料，話阿里同Ruby已經喺情人節前分手，原因係呢位熱刺中場成日掛住打機。據講阿里沉迷咗玩網上遊戲《fortnite》後就成日冷落Ruby，加埋要去練波同比賽，基本上已經冇時間陪Ruby。一位同佢兩個相熟嘅友人，就向《太陽報》記者證實Ruby已經離開咗阿里喺倫敦價值200萬鎊嘅豪宅。
報道引述友人話：「阿里同Ruby已經玩完，佢哋關係一直都唔穩定㗎喇，但家陣女方覺得冇得掹，去到盡頭喇。Ruby好傷心，但佢已經忍受唔到阿里唔識得管理自己嘅時間，佢已經執晒啲嘢離開咗阿里屋企，家陣自己一個生活緊。」
記者亦發現阿里同Ruby都已經互相喺ig unfollow對方，即係話好大程度冇彎轉，Ruby今次真係下定決心同阿里斬纜。其實阿里私生活一向都唔係咁檢點，之前就試過流出疑似係佢同不知名女士嘅性愛影片（下圖）。2個人3年幾前就曾經短暫分開過一段時間，有傳嗰次係阿里搭上一位真人騷女星，結果Ruby知道後，仲喺公開場合炒大鑊咁分手，但阿里之後知衰𠱁番Ruby，半年就成功箍煲。去年武漢肺炎疫情間嘅暑假，兩人仲齊齊遊希臘小島Mykonos度假，喺海灘又錫又摸，上晒報紙。
當年就打得火熱，但如今Ruby發現唔係輸咗畀另一個女人，而係輸咗畀隻game，可能正正因為咁先心灰意冷。不過阿里就算情場失意，但事業就好似有啲起色，上周三歐霸盃32強次回合，就整咗球倒掛世界波，仲送出兩次助攻，協助熱刺大勝禾夫斯貝加4:0入16強，連領隊摩連奴賽後都承認佢啲狀態開始起番，唔排除周日主場對般尼場波會派佢打正選。
