德國球星奧斯爾上個月加盟咗土超嘅費倫巴治，仲喺「地標戰」助球隊贏波。可惜呢位前槍手之後就無乜表現，2次正選、3次後備上陣踢咗285分鐘，但一個入球助攻都冇。結果費倫巴治呢5場輸咗3場，當中包括喺聯賽輸畀爭標對手加拉塔沙雷，同埋喺土盃八強輸畀巴沙克舒希出局，球隊嘅聯賽排名更由佢加盟之前嘅第1位跌落第3位。