手機用戶請按此放大圖表
曼聯中場保羅普巴喺今個月初主場鬥愛華頓嘅賽事不幸受傷，疫情期間只能留喺屋企養傷，而無所事事嘅佢就喺ig分享自己嘅近況，順便畀大家窺探吓佢位於柴郡、價值300萬鎊（約3,300萬港元）豪宅嘅內貌。不過，呢位法國中場康復程度良好，有機會喺下月七日作客曼城嘅前列大戰復出。
普巴間豪宅簡直係各位男士嘅夢想家園，大之餘仲應有盡有，淨係間遊戲房都羨慕死人。普巴上載咗張自己喺度玩桌上足球機嘅相，部足球機仲印住佢個名「PP（Paul Pogba）」嘅簡寫，好明顯係佢專登搵人訂做，佢仲喺個post寫住：「你哋知唔知我係桌上足球機嘅專家先？」
張相仲影到佢間遊戲房嘅環境，除咗身後仲有張都係印住「PP」嘅桌球枱外，最吸引眼球係有一個巨型大魚缸，牆上就掛咗啲有關佢嘅剪報，同一幅法國國家隊錦旗，全部用上框架鑲起。除咗呢間遊戲房外，普巴大宅裏面仲有一個小型室內足球場，之前佢分享過佢同兩歲大嘅囝囝Labile喺裏面玩嘅片段。相信佢屋企咁多康樂設施，就算因為防疫條例要減少外出，普巴一家留喺屋企都唔會悶親。
普巴已差唔多缺陣咗一個月嘅時間，領隊蘇斯克查近日就話呢位法國中場就嚟復出：「普巴已開始出番球場訓練，佢已經一步步康復緊。」嚟緊曼聯喺聯賽要鬥車路士、水晶宮同曼城，外界就推斷普巴好大機會可以趕得切喺榜首大戰鬥曼城時復出。
蘇B早前講明唔會放棄同曼城爭英超，球員練波都非常肉緊，禮拜三練波玩「馬騮搶球」時，勞基梳爾同哈利馬古尼兩位後防孖寶就起爭執。做「馬騮」負責搶波嘅梳爾自覺掂到馬古尼腳下球，就執起個波同對方理論，點知馬古尼就話梳爾冇掂到，旁邊嘅教練都認同馬古尼，搞到唔服氣嘅梳爾一怒之下用力掟個波落地下。不過，好快梳爾就笑番，事關佢成功截到個波唔使再做「馬騮」，曼聯成班球員連練波態度都咁認真，睇嚟都好有火喎。