現年83歲的資深藝人余慕蓮（魚毛）於去年11月因肺纖維化入ICU，有傳她患罕見血癌，由於細菌入肺要插喉助呼吸，情況一度危殆，幸搶救後好轉，早前轉往九龍醫院治療，昨日魚毛接受車淑梅電話訪問時報平安，她聲線沙啞表示已拔喉：「係呀，幫我拔咗條喉，我幾個月冇講嘢，拔咗三、四日，但唔可以講咁耐，唔夠氣。」
車淑梅指很多人掛念魚毛，問到有甚麽想跟大家講？魚毛坦言：「我希望早啲可以食嘢，因為我𠵱家係飲緊流質，希望我可以食嘢，我有力先至可以起得身，我𠵱家仲係瞓喺張床度，大小便都要用片，醫生畀我講吓電話好開心，打咗畀十幾個人。」她表示希望可以進食：「唉，乜都想食，幾個月都未食過嘢，同房嗰啲又早餐、午飯、晚飯，我唔食得，醫生話要等營養師，要照X光，睇我識唔識吞嘢，如果唔識吞呢，就驚住鯁親。」雖然聲線沙啞，但魚毛精神不錯，她說：「我有做物理治療，但唔知幾時出院，唔敢講，要睇情況，食得嘢先至有力起身，長期瞓床背脊都損咗。」最後她多謝大家關心，並表示：「希望快啲出院，拜拜！」
另外，70歲的吳孟達（達哥）早前由好友田啟文（田雞）證實不幸罹患肝癌，兩個月前做切除手術，現留院接受化療。達哥患病消息傳出後，有指昔日達哥的電影「戰友」周星馳（星爺）即時致電田雞詢問，田雞昨日回覆《蘋果》時承認此事，他說：「星爺之前打畀我問達哥近況，關心佢，睇吓有冇嘢幫到手。」田雞補充未聽過達哥經濟出現問題，又指星爺一向關心朋友，只是為人低調。
星爺與達哥多年來合作無間，二人還上契，星爺做契爺，達哥做契仔。惟2001年二人拍完《少林足球》後便再無合作，一度傳雙方有心結。前年達哥接受內地傳媒訪問時，坦言與星爺有種「老死不相往來」的欷歔，不過近日達哥上內地節目時再談到星爺，轉口風希望再合作。
