貪靚的本地隱形富豪即使身家以百億元計，仍緊貼地產市場，睇中就買。最近他得知馬鞍山有間全新洋房招標，附近有他最愛的高爾夫球場及開揚海景，興致勃勃，洋房保守估計超過2億元，還邀請著名設計師操刀，就叫在下陪他去睇現樓。結果，在他眼中，真係得啖笑。
富豪睇的洋房樓高3層，實用面積約3,400方呎，前後花園共約1,500方呎，再有約450方呎天台，他從來直話直說：「指引價超過1億元計嘅屋，間工人房咁好笑嘅，張碌架床得上格，下格係個櫃，工人要日日爬上上格床先瞓到。泳池仲離譜，根本小朋友都游唔到水，可能叫浸腳池好啲。所謂嘅獨立屋，話就話包3個車位，其實只係地庫嘅共用停車場，冇乜私隱可言。」行到天台，他望住只是相隔不足一隻手距離的隔籬屋，疑惑地說：「呢幢係咪獨立屋？排屋係排屋，獨立係獨立，兩間屋嘅牆相隔咁近嘅，完全唔似獨立屋呀！」
在下睇到富豪彈到億元豪宅一文不值，就說曾經在九肚山看見某洋房的泳池僅4米長，比起這個更細，與其說它是「浸腳池」，不如索性轉做「錦鯉池」。富豪最後都意興闌珊，揮袖而去。樓盤有13間洋房，暫時只賣出1間咁多，原因或許是，這根本不是本地富豪的那杯茶。
小師兄