打針騷被網友質疑支針筒唔似樣，思疑滲水。同一天中共確認愛國者治港ABC，打鹽水扮國貨，被追究下來，點死！高官建制寫包單，冇人敢咁薑。幾位醫學專家倒是明確向兩劑科興說不，管治新常態下的筍工縱然吸引，未必有命享，你針埋佢份。
愛國者治港，一針見血，滿口愛國愛黨但成家外國護照者，過往享盡雙重國籍福利，終於感受死路一條的埋身恐懼。樓可以賣，外國護照在今時今日放棄，子女在澳洲極愛袋鼠國的譚公與楊局長、持英國護照家人全部入籍的689與777、緊急棄居英權換取立法會主席的梁君，難免為愛情與麵包的抉擇失眠。老婆是「紐約時報」員工那隻鼎，等住照肺，黨的X光未必分得出外國勢力的顏色，到時要九十度彎腰，肛檢驗明愛國情操！建制派到中央圖書館展覽廳打完科興順便做埋肛檢，安心出行一嘟過！話時話，呢隻安心app，竟然嘟出國際，下載國家維德角、密克羅尼西亞、安提瓜巴布達，密密嘟，排名衝上第一！聽都未聽過的國家安裝這隻「鹿」，姑且當做移民九唔搭八他方的香港人，正在唔停手咁幫薛局長打緊國際線！香港人，信佢五成，好嗎？明天強國網軍出征，愛黨愛到滲水，唔犯法的，幫香港嘟出三億未來人口都得！