安心出行App俾網民發現去到非洲、南美都係下載榜第一位，令人懷疑有人現刷下載，創新及科技局長薛永恒噚日第一時間否認，又話只有2至3%海外地區手機下載，相信係海外人士返香港，唔記得轉翻地區先出現呢個情況，但好快又俾網民踢爆呢個解釋唔成立，仲笑佢「真係唔識㗎」！
薛永恒噚日喺電台節目話，現時有約279萬人次下載安心出行應用程式，當中逾97%都係香港下載，至於點解安心出行喺多個島國同非洲國家下載量排名首位呢？薛永恒話唔清楚應用程式商店點統計排名榜，又話香港作為國際大都會，好多人會到不同地方工作同留學，或者拎當地手機返港下載「安心出行」，唔記得轉地區，於是下載紀錄變為其他國家地區。
薛永恒咁解釋，但好多網民即時笑佢「真係唔識㗎」，好似薯伯伯就寫文，話應用商店唔會因用咗 VPN同改變 IP而忽然變咗其他國家地區，佢又以Google嘅 Play Store 為例，如果開戶時候用香港，即使用 VPN 連接到冰島，你嘅 Play Store設定依然係香港，唔會變冰島，即使用家主動更改國家或地區設定，Play Store一年只容許一次更改，仲必須要申請，更改國家設定之後，帳戶入面原先其他貨幣結餘更會暫時凍結，八方睇完，結論係薛永恒解釋係唔多成立，唔怪得網民笑佢「真係唔識」！
李八方