此日到陸羽飲茶，早到，朋友未至，有友人傳來洪清田一篇大作（2月19日），講陳兆愷之法律觀、法律正義。左丁山與洪清田相識多年，係由鄭經翰介紹嘅，鄭大班1980年代中創辦資本雜誌時，洪清田係總編輯，左丁山係編輯顧問委員會主席，故此有機會見過面，開過會。到後來，洪清田在九十年代喺灣仔大王東街與朋友開咗一間飯店叫蒸燉炆棧，有地利之便，常辦傳媒飯局，次次請政治人物參加，晚飯暢談時事，不少高官議員都做過嘉賓，中聯辦張浚生及同事都有去過，彼此相談甚歡，最大粒嘅當然係肥彭，應邀出席過兩次，最後一次係在1997年上半年，著名漫畫家馬龍就地取材，用蒸燉炆棧嘅紙墊速寫肥彭肖像，請肥彭簽名送給座上客，好似係每人一張，詳情唔記得清楚了。肥彭嘅簽名係Fat Pang, the 28th and absolutely the last Governor of Hong Kong。肥彭份人對傳媒人冇乜架子，乜都唔怕傾，口才極好，唔怕講錯嘢，不時又去陸羽飲茶，左丁山起碼在狹窄樓梯碰過佢兩次，好似唔見有保鑣前後護駕㖭。
洪清田相識滿香港，今次大概有感而發，評論與佢同期之港大校友陳兆愷大法官（陳官生於1948，洪生於1949），幾唔苟同陳官，佢一開筆就寫：「以陳兆愷的專業與歷練、虔誠信仰和品格稟性，研討會上重點專題談三權分立與法治，怎會只選擇最表層……」筆下頗有惋惜與遺憾之意，以廣東話出口，就係：「乜連陳兆愷都咁呀！」顯見甚有感觸。
未讀完篇文，法律界人士C君駕到，派完利是，左丁山同佢談論洪清田文章，C君嘆一口氣：「我最近讀完終審法院對黎智英保釋（上訴）案之判詞，好有感觸，以後同類案件，怕唔使打咯。國安法就係尚方寶劍，香港法治基礎已變得不一樣，洪清田係有心人，同陳兆愷商榷只怕佢係浪費筆墨啫！」之後，C君透露有離去香港之意，但機會不太大，家人唔多贊成移民之議，仍待醞釀，C君有移民念頭皆因心頭愈來愈不舒服，有壓迫感。佢有不少老友嘅仔女在著名學校讀書，話猛咁收插班生，因為不少學生或被送去英國或隨父母移民，皆係去年七月一日國安法生效之後嘅事。