《極鬪》系列自2016年第一集面世，到今日已經拍到第八集《極鬪8十字狙蹤》，向着挑戰19集《陰陽路》系列的長壽紀錄邁進。被喻為香港cult片代表人物，人稱「Sam哥」的梁成致表示，觀眾反應由原先的「有冇搞錯」，到真心cult地欣賞，成績是靠金錢及毅力累積。
撰文：何永寧
攝影：沈健程
架上茶色眼鏡，表面惡形惡相，內裏是一顆傳道人善心的梁成致（Sam哥），早前在大角嘴的拳館接受訪問，雖然不像尹天仇般道出長篇大論的電影理論，但二人共通點是對電影的喜愛。面上掛着招牌大黑超，親切的笑容，聯想不到戲中手起刀落，殺人如麻的角色。不經不覺《極鬪》拍到第八集，有觀眾會關心電影會否一直延伸下去？Sam哥斬釘截鐵說︰「只要我仲有古仔想同觀眾分享，就會拍落去，而且《極鬪》系列冇題材限制，任何題材都可以，可以探討社會問題，好似《極鬪3雅博渡口》包含福音元素，只要仲有觀眾，我就會拍落去。」
每集必備的是暴力元素，今集講到Sam哥女兒被拐，他邊打邊殺，大汗淋漓救女，他笑言古仔是受《救參96小時》（Taken）感召︰「我都想抄佢哋，但唔得，我冇佢哋咁多錢做大製作，但係我想凸顯呢個議題，因為我都係一名父親，我會明白萬一我女兒被拐，我嘅心情會如何，我想演繹出嚟。」
Sam哥坦言：「Cult係逼出嚟嘅！」資金係其中之一，另一原因是自己外形不宜拍文藝戲：「我唔擅長拍文藝片，純動作片又拍唔到，惟有向呢方面發展，比較cult，每樣元素都加一啲。」
Cult片主題離不開科幻、喪屍、暴力血腥和色情元素，不過Sam哥身為傳道人，色情可免則免。本身從事市場推廣，閒時用私己拍戲，每部作品都限制在100萬之內。Sam哥自言一開始沒想過拍cult片，流程一般都是先度劇本：「通常有六、七成古仔就開工，同王家衛一樣，唔會有完整劇本。古仔都由自己主導，靈感到就隨時改，拍多啲散shot，以免最後剪唔埋。拍動作場口就最過癮，可以滿足到英雄感。」
Sam哥說可以為一場動作戲而改劇本遷就，礙於資金所限，電影有很多缺點：「血唔似血，假手一睇就知係膠，好流！」但就是這些瑕疵，令Sam迷趨之若鶩。
目前正修讀神學，Sam哥身處的武館逢周日會變成教會，Sam哥化身傳道人講道，他說︰「Cult片最緊要係睇味道，搵一啲唔知名演員，睇得出佢哋有熱誠。」回想第一部電影上映時，因太多瑕疵，換來觀眾真心恥笑。Sam哥話會用另一角度睇，觀眾睇得開心、朋友間有話題，目的已達到。
Sam哥講到起初有一班人，專登入場睇戲跟住批評︰「唔緊要，你有目的，能滿足你就好，當然現在負評越嚟越少，亦都係我嘅動力。起初我做得唔好，有人批評，我認命。」之後利用時間及經驗，自己盡力將作品拍好。那班曾批評的人，不少已成為他的fans。講到最難忘的作品要數到上一套科幻片，戲中Sam哥一人分飾七個角色，全部被怪獸殺死，cult得來不失教育意義：「被怪獸殺死嘅，全都係壞男人。」
