作為升市最大勢力，新經濟股仲有冇能力回升破頂？相信最直接嘅指標就係睇Bitcoin價格，原因係長期配置新經濟股同埋Bitcoin嘅投資者，抱住理念較為相近，假如Bitcoin見頂急瀉，某程度上代表地球上已經缺乏足夠資金去推升新經濟呢個大雪球，將會累及市場對新經濟股信心。Elon Musk唱好Bitcoin，連Tesla都入手，吹雞炒起Bitcoin變相撐住自從1月上旬開始疲弱嘅Tesla股價，Elon Musk一句”seem high”又可鋪路食糊，何樂而不為？睇返Bitcoin同埋納指期貨嘅即市走勢，近日步伐非常一致，周一Bitcoin大跌，Tesla都跌8%，似乎兩者本命相近。
對於成手新經濟股嘅投資者嚟講，其實有Bitcoin崩盤累及新經濟股大跌、導致倉位賬面盈利大減嘅潛在風險，呢一點值得留意。執筆時Bitcoin一度跌穿2月中嘅橫行區、險守45,000美金然後反彈，呢個位實在不容有失。
至於新經濟股呢一刻買唔買得，見Bitcoin大陽燭回升先再追入，相信仲有唔少水位，𠵱家最好嘅就係睇住Bitcoin做人了。
晉佳