林作早前抽水抽出禍，遭富三代鍾培生反挑機掟百萬向他下戰書「隻揪擂台戰」，事件發酵幾天，林作前日聲言應戰，兩人互寸會打死對方，又指昨日會簽生死約。不過昨早林作收到鍾培生合約後於Ig拍片，撕爛生死約並說︰「咩鬼律師寫嘅爛鬼拳擊賽事舉辦的合約？0分重作！」叫鍾培生親自與他洽談，鍾培生轉貼林作影片回覆：「除咗生死狀同出場費唔改得，有咩可以配合你。」
對於林作撕爛生死約，鍾培生向《蘋果》表示：「唔傾，唔嘥時間，唔打由佢！」林作回覆《蘋果》時反駁：「啲條款垃圾，寫得太業餘，包括我打瓜佢點算？咁就叫簽份合約呀！」擂台戰疑似告吹，令網民質疑他們私下夾計宣傳。
林作女友裕美坦言睇好鍾培生實力較強，卻支持林作出戰：「想打佢好耐，因為佢個樣想撩打。我會叫佢加重保險到1,000萬，受益人寫我個名。如果塊面傷咗，咪乘機整埋容！」林母Lily都盲撐囝囝：「我支持佢挑戰鍾生，個仔一向好有自信。」
