上周重心阿爾克馬爾「客勝」冇令大家失望，今周有兩場荷甲補賽都幾啱心水，其中格羅寧根（圖）主場對飛燕諾嘅前列大戰，「飛仔」呢排走勢麻麻地，防守更加甩晒碌，周三作客格羅寧根仲要讓平/半，今次重心一定係下盤啦。
星期日有睇飛仔作客川迪場波，上半場初段飛仔好似未瞓醒咁，川迪簡簡單單已經入到兩粒，如果把握力好啲，其實真係唔止，好彩飛仔攻力都算唔錯，入番2球逼和2:2，拎番1分排第4，不過同一周燕豪芬、阿爾克馬爾等前列球隊都贏波，飛仔變相俾對手拋離兩分，爭前兩位更加難。講真飛仔作客一向唔多掂，近5場只贏得1場，對手亦只係鹿特丹斯巴達。睇番海外莊家賠率，飛仔繼續被追捧，客W平均值都只係得2.15倍，今場繼續要讓平/半，真係相當唔抵。
格羅寧根排名第六，歐霸附加賽嘅位置都算穩陣，不過始終都要繼續搶分，特別係主場，成績又真係唔錯，11場主場取得6勝3和2負，甚至榜首阿積士嚟到都輸波，認真唔講得笑，今場除咗下盤，未知足智彩會唔會開「第一隊入球」，以飛仔防守力咁差，冷敲格軍「第一隊入球」都唔錯。
同日另一場威廉二世主場對海牙係榜尾大戰，兩隊近況都頹，勝負好難估。不過始終兩隊攻力都差，護級大戰亦都會重視防守，可以敲吓入球「細」。
文：Goal進
截稿前馬會尚未開盤，盤口僅供參考，讀者記得留意足智彩網頁。