25歲外號「莉莉菇」的林靜莉是港姐季軍鍾慧冰獨生女，現職生活科技資訊網站記者，最近大受連登討論區巴打歡迎，讚她靚女可做GFable。作為星二代，她不想靠母親名氣而被認識，怕別人知道母親是明星後會抹殺自己的努力：「但人大咗諗法唔同，我好驕傲我媽咪係鍾慧冰。」與母親相依為命的她，因早年母親患病未能多陪伴感慚愧，承諾會補償。
撰文：黃曉妍
攝影：陳弘
當了「連登女神」的林靜莉日前接受《蘋果》專訪，對於被連登仔讚靚女可做GFable，她卻不認同：「我唔想靠樣搵食，可能係太唔了解我，但我好開心嘅，多謝大家欣賞我。我心目中嘅GFable係好溫柔、好𠱁得人，但我就外向啲、活潑啲，唔係溫柔路線。」她謂曾有網民瘋狂留言：「曾經有個人想要我着過嘅鞋，然後畀返錢我，我ignore咗佢。亦都試過有人出錢，叫我出去陪佢兩個鐘，佢冇話要做啲乜，我都係ignore咗佢。」
修讀新聞系的莉莉菇，畢業後加入港龍做空姐半年，亦遇過瘋狂乘客：「有個大約40歲嘅男人係咁按鐘，又話要可樂，又話要冰，好多問題，然後又話想喺回程班機，一定要搵返我買化妝品，又問我攞電話，佢窮追不捨，到落機，佢坐喺度唔肯走，話要同我合照，影完佢就走，到我哋落機，原來佢企喺度等我。」
星二代不易做，莉莉菇不想靠母親的關係而被人認識，不斷求新的她棄空姐轉做記者一年多，以外號「莉莉菇」介紹新科技產品，她自爆原先叫Peter仔，勝在易記又貼地，但她的老闆要求她轉換一個女性一點的名字，於是就叫莉莉菇。她還在香港開電視主持兒童節目及美食節目，希望將來繼續發展。
然而莉莉菇不想外界知道自己是鍾慧冰的女兒：「我朋友嚟我屋企，我會將后冠、媽咪啲相、明星合照全部收埋，只係我一啲好朋友先知道，因為我好驚自己嘅努力，憑一句『你媽咪係邊個邊個』就抹殺晒，但人大咗諗法唔同，我好驕傲我媽咪係鍾慧冰。」雖然經常戴媽咪的后冠，但她沒有參加選美，並自言是個頗自卑的人，談不上美貌與智慧並重，加上五音不全，所以沒有參加ViuTV的《全民造星》。
莉莉菇人生中有三個很重要的女人：「第一個係毛舜筠，佢做戲好好，係我演戲上嘅一個榜樣；第二個係契媽林建明，冇佢可能會冇我，因為媽咪係高齡產婦，有咗我之後，媽咪有產前抑鬱，契媽話『我上契，如果你養唔起就我養』，前幾年媽咪大病，契媽係會幫媽咪剪指甲、腳甲，我覺得要有一個好深厚嘅感情先會做到。」
單親家庭長大的莉莉菇，母親當然是最重要的人，鍾慧冰在2016年底因免疫系統問題患上脈管炎，當時曾擔心因癱瘓連累家人而想過輕生，當時莉莉菇很害怕，不知如何能幫到母親，鍾慧冰曾經講過嬲女兒沒有去探她，莉莉菇帶點激動說：「確實係有做錯，我要多啲關懷媽咪，但當時我有舞台劇喺身，媽咪冇好好同我講佢發生乜嘢事，大家都唔知咁嚴重，我見到有其他人陪佢，我冇諗過唔陪，之後有同媽咪道歉，我知道冇辦法挽救，𠵱家會好努力去補償。」