手機用戶請按此放大圖表
周日意甲榜首大戰米蘭打吡，國際米蘭主場對AC米蘭，最終國際憑拿達路馬天尼斯梅開二度，加上盧卡古入波，以3:0大勝對手，將聯賽榜嘅領先優勢拉開到四分。呢場後成為史上第一位球員，連續喺五場米蘭打吡都有波入嘅盧卡古，慶祝時嘅怒吼似乎係回敬曾自稱上帝嘅伊巴謙莫域，仲問米蘭嘅上帝去咗邊，真係寸到伊巴應一應。
一開波國際已經壓住米蘭打，五分鐘就已經搵到入波，盧卡古右路傳中，好拍檔馬天尼斯門前一頂入網，為球隊先開紀錄。33分鐘，米蘭都有黃金機會，後上嘅迪奧靴南迪斯殺到入禁區起腳，可惜僅僅柱邊出界，國際半場領先一球。換邊後米蘭加強攻勢，但伊巴兩次射門同辛度東拿利嘅近門勁射，都係過唔到國際門神漢丹洛域。結果去到57分鐘，國際憑一次快速反擊，比列錫橫傳馬天尼斯射成2:0；66分鐘，盧卡古中路推進再左腳勁射近柱，為國際以3:0完勝AC米蘭，賽後以23戰得53分，穩坐意甲榜首。
兩隊前鋒盧卡古同伊巴固然係今場焦點，2位前曼聯隊友早前喺意盃8強已經爆過衝突，仲搞到各自停賽一場，已經令呢場波加咗唔少火藥味。今場盧卡古喺入波後，終於爆哂啲怒火出嚟，佢66分鐘幫國際贏到3:0之後，好激動咁跑去角球旗慶祝，仲係咁拍心口講咗幾句野。當地媒體透過現場收音後發現盧卡古話：「上帝呢？一早講過我先係最勁啦！」其實佢都係回敬伊巴，盧卡古上季贏咗米蘭打吡後，曾自稱係新嘅米蘭國王，當時伊巴就即刻霸氣回應：「米蘭從來都冇國王，只有上帝！」仲暗示自己就係上帝。
今次盧卡古完全係一吐烏氣，自己以17球成為意甲神射手榜第1位外，仲幫國際壓過米蘭繼續做榜首，難怪伊巴今場都冇咩火回敬。盧卡古除咗帶領球隊贏波外自己亦打破紀錄，佢由2019年夏天加盟國際後，已經連續喺五場米蘭打吡有波入，令佢成為史上第一位做到呢個紀錄嘅球員，呢次盧卡古仲唔係米蘭打吡之王？