展昭夜審烏盆問：「你個烏盆，有什麼冤情，從實招來。」
包龍星說：「你問錯問題，應該問，你這個盆呈現污泥色，黑釉應該是建窯出品，本來是用來鬥茶，優雅啲咪好囉，何以要做勇武鬥士，咁至問到冤情出嚟。」
展昭問：「衙差打人，是依法執法，你個烏盆點解要用雷射筆射人眼睛咁惡毒？」
包龍星說：「你問錯問題，應該問，點解你地啲黑釉要仇視衙差？我敢講，冇一個茶盆天生係黑嘅，係俾建窯環境土壤抹黑了。我塊面又夠黑啦，唔通你話我係黑官，你唔通又係黑衙差咩。」
展昭問：「你唔尊重衙差，令衙差得唔到保護，以後點吸引優秀人才加入王朝馬漢行列，保護市民啊？」
包龍星說：「你問錯問題，應該問，如果衙差忠誠勇毅有餘， 都得唔到百姓尊重，咁點吸引人才當差。本官若然得唔到你尊重，展大俠喎，有俠義嘅人都唔會埋我堆啦。仲有，王朝馬漢係司法部衙差，唔係警巡，唔好撈埋一齊，分清楚啲好。」
展昭問：「睇你啲釉色咁嫩，冇乜包漿，應該好後生，點解你覺得後生就係免死金牌，可以任意行事唔駛負責？」
包龍星說：「你問錯問題，應該問，早生幾年點解就大晒。依家大晒嘅係我哋喎。包漿係被人摸得多，夾夾埋埋啲塵呀咁，搞到厚皮厚臉。冇話後生大晒，依家咪係被告，俾你審緊囉。」
展昭又問：「你師長啲求情信讚你善良上進，咁點解大好青年又要犯下如此惡毒嘅罪行，係咪要檢討我哋國子監嘅教育出咗乜嘢問題呢？」
包龍星又說：「你又問錯問題，應該問，科舉制度係咪出問題，點解衙差唔駛考科舉。個個都出身國子監，唔通個個都犯案咩。既然話大好青年，即係相信老師求情話佢善良上進，咁就係老師教得好啦。你唔係想審埋啲老師吓話？」
展昭又再問：「你唔顧衙差嘅感受，本庭亦唔需要照顧你嘅感受。」
包龍星於是又再說：「你又問錯問題，應該問，聖上如果唔尊重百姓感受，點解我又要理聖上感受。仁宗大度，我啲口水都噴濕過聖上塊面，反而感受到我夠忠誠勇毅，敢直言進諫。仲有啊，啲乜嘢公安條例啊，係五代十國留下來對付胡人嘅惡法。你成日用非法集會啊、阻衙差辦公呢啲罪名，即係用後梁朝嘅劍，斬宋朝嘅平民百姓啫，咁樣真係審死官㗎。」可憐烏盆完全沒機會講嘢，就宣佈退堂。