年初七開始，食肆每枱食客可有四人，經營者無一不鬆一口氣，去年11月至1月嘅失業率已升至7%，12月至2月嘅失業率相信冇起色，可能繼續升呢；大概政府老早已掌握數字，知道唔放寬重災區嘅酒樓餐飲服務業都唔得，否則農曆新年之後，大量食肆宣佈執笠，失業率會打破2003年嘅7.9%都似。
放寬食肆嘅一個條件係要用政府嘅「安心出行」app或食客要登記姓名及電話號碼。年初七左丁山到一間淮揚酒家食午飯，知客要食客（一）用app或（二）登記資料，左丁山冇「安心出行」app喎，梗係登記啦，知客遞上一張表格，一睇，上面已有二三十人姓名及電話號碼，後來者一眼見晒，但又分唔出邊個喎，因為香港人好鬼精，姓名全部寫英文，大部份係潦草睇唔清寫乜嘅，舉個例，有人寫P.K. Zhe，點知道係乜誰呀，至於電話號碼，都唔知係唔係真嘅。餐廳飯店如此收集表格，如何處置呢？相信係插入File存檔，無人再理。
平時去過邊度食飯，左丁山在電話之約會簿上有晒紀錄，唔慌冇得跟，根本無需出行app提醒，只要政府宣佈某月某日某餐廳有確診人士光顧過，左丁山一定知道自己有冇去過，其實大部份中環行政人員都是如此，用出行app只是幫助政府或某些黑客追蹤啫啩，對自己根本無好處。還有年青新派人物，去邊間食肆都要po相放上fb先至安樂，行蹤冇秘密，亦係唔需要出行app嘅。
食完飯打個電話問餐廳R，問佢情況點，佢話生意確係好咗，生意額突增可濟燃眉之急，希望可以繼續落去，但再來一次晚上嚴禁堂食嘅話，想唔炒人、繼續裁員都幾難，黃台之瓜，何堪第三摘，第四摘也。餐廳R順便提醒左丁山，CNN有一段報導叫做Food and food packaging highly unlikely to spread Covid-19, experts say，大家可以安心食。於是搜尋文字睇吓，原來係美國FDA（食物藥物局）發出公佈，美國專家經一番研究後，認為食物及食物包裝會傳播COVID-19之說，缺乏證據支持。此研究係美國FDA，美國農業部及抗疫中心（CDC）聯手進行嘅，三個單位嘅專家認為 COVID-19係由呼吸系統傳播，調查1億確診個案之後，搵唔到食物傳染新冠狀病毒嘅具體證據！