唔少機構每年都會搞春茗，高層藉此同傳媒敍舊，講吓公眾關心嘅議題。主張「政（治）教（育）分離」嘅城大今年無懼疫情，噚日舉辦傳媒春茗講吓學校發展，《蘋果》就未獲邀，校方解釋係疫情所限！不過據聞獲邀嘅記者都一肚氣，形容城大自製「關公災難」喎！
八方打聽所得，獲邀出席城大春茗嘅傳媒共10間，包括報章、電視台同網媒，偏偏《蘋果》同「立場」冇份。點解《蘋果》唔獲邀，城大公關話疫情所限請唔到所有傳媒機構，仲話一直好重視同傳媒嘅關係，遲啲「得閒飲茶」。
不過獲邀嘅「相熟傳媒」都未必有收穫，原來校長郭位喺春茗大部份時間介紹新校歌，聽聞佢仲有份填詞㖭！校方仲介紹近年力谷嘅獸醫學院，郭位被問到農場有咩農產品，居然話有牛奶同埋牛肉！唔通獸醫學生劏牛順便賣牛肉？最蝦碌係，據聞公關應承會有問答環節，當一眾記者蓄勢待發之際，公關突然話時間唔夠要取消問答，搞到全場記者O嘴，唔少人都同八方抱怨校方自製「關公災難」。
李八方