曾經是中環一景、幾乎沒有人未聽過在戲院里自彈自唱的中菲混血兒馬賦馳的「榮光」。和你sing不屬地攤經濟，中環亦不是MK魚蛋革命聖地，除了歌手，還有勁揪到上埋國際新聞的乞兒，乞兒婆撒滿雜物渾身臭味但見過大蛇屙尿的中環西裝友當她無到，無人踎低施捨五百蚊，亦無差佬鬧她阻街。唱榮光，唔，待遇不一樣，差佬拉人，一直攝在華人行側門的清潔大叔電光火石間跳出來指證，噪音嘈過車聲。法官反問：當日是星期三，嗰度係中環喎。證人說：「嘈到我睇唔到邊啲地方污糟。」耳聰則目明，清潔工指控音樂能鬼揞眼，情況屬實，醫學權威『刺針』一定搶閘刊登。大叔體質敏感度與唐英年無異，應該被優先，與高官一齊打科興，對準耳仔或者瞳孔打落去，唔驚鬼煞咁嘈，效用增強到77.7%都唔定。臨床冇數據嗎？專家唔等埋發叔了，對科興開綠燈，信納吧。港府全力留島不留人強攻，無非是想將香港人變晒清潔大叔，睜大眼說，睇唔到邊忽污糟，冇污糟嘢，和尚打齋，安心出殯。清潔大叔天經地義升級為優才，重點栽培，挺身而出，做港台阿頭，下令唔俾講人話，邊個嘈就炒邊個，等住辦公室上吊！