「戲院一開，和你重聚」。《狂舞派3》初七終於上映，由當年對白「為咗跳舞，可以去到幾盡？」到七年後重聚，進化成戲中主題曲歌詞「為咗發夢，可以去到幾盡？」
Heyo和阿弗，兩位既是《狂舞派3》演員，又是主題曲作詞兼rapper，一同接受訪問的兩人，前者冷靜，後者感性，阿弗抒發完很多感受，Heyo總冷靜地打圓場。這對好兄弟拍檔，性格不盡相同，默契可以滿分。
兩年前已經完成的詞作，放在今天這個都市，命運共同體。阿弗說：「𠵱家直頭係你腦裏面諗緊咩，你已經feel到有啲危險，會唔會諗呢樣嘢唔得呢？會唔會有危險發生呢？會有呢啲恐懼！」
電影主題曲名叫《歡迎嚟到呢座城市》，現在仍歡迎？Heyo答：「歡迎嚟吖！一覽無遺，入面充滿悲喜，呢個就係我哋24小時裏面，唔會停止嘅香港。」
神預言的，不只歌詞，還有電影的對白和情節，兩年後都在現實陸續發生了。正如電影其中一句對白，阿弗說：「就係『好人一生平安』！」
撰文：文嘉龍
看完電影，會對主題曲感受更深。由小朋友唱出合唱團般的童真歌聲，「跳進我們的家，來吧，眼裏載滿渴望熱情……人連人，手挽手，齊祈求，快樂到永久……」；跟住到Heyo和阿弗rap出現實控訴，「都市下沉中，制度穿晒窿……係時候解封，捍衞自由係時候發功……」
阿弗說：「我哋啲rap就好似面對緊一種現實，有啲咩困難問題，將佢哋（小朋友歌聲）擺埋一齊，對抗嘅時候大家會諗到啲咩呢？」Heyo補充：「正如導演（黃修平）所講，係一首充滿衝突嘅歌，社會亦都好兩極，我哋和盤托出！」理想與現實，從來天與地。
兩年前的創作，放在今天不謀而合，電影中一群在「龍城」的各色人等，為夢想為生活受盡打壓；歌詞中的控訴更令人想起不少抗爭畫面。Heyo和阿弗都說「太神奇！」阿弗說，幾年間在公在私都常和導演談起香港的社會問題，「其實好神奇，我哋傾呢個劇本到傾呢隻歌，大部份有六七成時間，我哋講緊個社會大環境，真正傾劇本可能只係三四成時間。我哋傾嘅時候已經講，會唔會發生呢啲事情，如果發生會係點，嗰時我哋已經講緊一啲運動嘅方向。兩三年前寫咗嘅歌詞，竟然可以符合返𠵱家個推演，我哋都覺得好神奇，好似有啲預言嘅效果。」
更加神奇的是，戲中的部份對白甚至情節，拍完之後竟然在現實中應驗，Heyo：「冥冥中有啲微妙關係。」阿弗解說：「竟然兩年之後，大家都會講，但係我哋諗呢句對白嘅時候，大家都仲未有呢個共識。」
那句對白是：「好人一生平安。」阿弗說，那場戲的內容是這樣的，「嗰個角色人物係一個執紙皮婆婆，點解呢個社會出現呢啲現象，執紙皮婆婆已經咁老，仲要咁辛勞，佢哋信念係咩呢？佢哋心裏面有一句乜嘢說話呢？我同導演度，不如『好人一生平安』，佢哋可能心裏面就係顧念住呢樣嘢，𠵱家竟然發生咗出嚟，香港人心裏面都係顧念住呢樣嘢，好多人潛意識都有呢個信念，係咪好人就可以得到一生平安呢？」
去年11月，Heyo和阿弗連同導演黃修平到台灣參加金馬獎，《狂舞派3》入圍六項提名，除了最佳原創電影歌曲，Heyo更競逐最佳新演員。頒獎禮當晚，Heyo和阿弗在台上唱出入圍歌曲《歡迎嚟到呢座城市》。
「我好開心做到一直想做嗰樣嘢，其中一個里程碑就係可以將廣東話去到以非廣東話地區表演，好有幸可以傳承到廣東話文化。」Heyo說。台灣與香港，這麼近那麼遠，阿弗到台灣那一刻，百感交集，「成個過程心情都好複雜，一方面係細細個一個夢想，希望將rap帶去其他地方，將廣東話rap推動，可以參與電影創作，𠵱家實行咗，發覺唔可以淨係關注喺嗰個滿足感。去到台灣，我會諗到，呢個時候好多人想去，可能去唔到，或者去嘅過程當中，有啲乜嘢慘嘅事情發生……」
沒有比較就沒有傷害。阿弗說，身在台灣，才驚覺自己原來很久沒有正常生活過，「見到人哋可能因為封關，跟住之後個防疫做得好，市民喺街上面氣氛好和平好chill，突然間感受到正常生活，喺一個唔係自己屋企嘅城市，原來正常生活係咁㗎？跟住心情就好複雜，好耐冇試過正常生活。可以坐低講嘢，唔驚腦裏面有乜諗法，講咗出嚟有乜危險威脅，可以大家閒談，見到一啲過咗台灣嘅香港人，同佢哋食飯飲嘢，可以大大聲講我哋想講嘅嘢，原來係咁㗎？點解我哋好似唔係咁嘅？」
Heyo則說見識了台灣對藝術創作人的尊重，「佢哋對我哋呢班創作人嘅待遇亦都唔同，我哋完咗金馬獎去酒會都兩三點（凌晨），文化部有官員特登過嚟賀你，同你講有乜嘢要幫手。我自己喺香港，我都喺林鄭面前表演過啦（蒲吧活動），佢唔會理你㗎，你明唔明白呀？因為呢啲經驗形成對比，到底大家官僚制度或者系統，其實係點樣對待自己文化，我有幸參照囉！」
從小已經立志成為rapper的Heyo，他說就像一個感召，「好迷離，有種瀕死感覺。有一次飲到好大好辛苦，有種我會唔會離開呢個世界嘅感覺，跟住我就開始反問自己，我唔想離開呢個世界，我再反問自己點解唔想離開呢個世界，後尾我就畀咗個答案自己，我要做一個rapper，跟住一嘢嘔晒出嚟！搵到呢個答案，解鎖！」
中學年代開始接觸hip hop文化的Heyo，在維園認識了不少hip hop中人，2009年已經以《字遊軍》名義推出混音帶，2016年推出首張個人專輯《花華》，曾與衛詩合唱過一曲《盛夏的舞》。阿弗笑言：「Heyo成日都會向我偷師㗎！」Heyo答他：「梗係要啦，個個都係老師！」
千禧年代開始，阿弗已開始創作hip hop音樂，畢業於浸大電影電視製作系的他，畢業後從事短片製作，他早與《狂舞派》結緣，2013年為電影參與配樂工作。Heyo和阿弗認識多年，兩人行的路卻不同，Heyo好早已決定以rapper為正職，「我必需要咁樣對待，even收入好飄忽。呢年因為疫症放慢咗腳步，有危又有機，反而令到你更加清楚，無論乜嘢情況底下都要行一條咩路。」阿弗卻說：「我反而選擇咗行第二條路，我唔當創作係全職，如果當佢係一個職業，你就會接咗好多唔想做嘅工作，為咗生活壓力成日都要追趕，快感會磨蝕。」
阿弗說，拍《狂舞派3》最難忘是到紐約一家塗鴉用具店門外拍攝塗鴉的一場，竟被便衣警察即場抓了，被關在法庭的集體監倉八小時。「畫完（塗鴉）之後，行咗兩條街，跟住有便衣出嚟拉咗！去到保持緘默，唔好簽任何文件，去到court困咗八個鐘，最尾排到法院閂門之前上咗我個case，最尾冇話定你罪名，只係話半年之內你唔可以因為呢樣嘢再俾人拉！呢個就係我好深刻嘅嘢，可以同人講，我冇去過自由神像，但係你有冇去過New York City Court監倉吖？你真係會見到好多少數族裔好多黑人，入面派啲三文治畀你食，困咗八個鐘。要補充就係去到世界任何角落都好，保持你嘅緘默係你嘅權利，唔好立亂簽任何文件！」
緘默有時，發聲有時。歌詞其中有句是：「去守住呢個都市，以我哋嘅名義。」問到兩人如何守住香港，Heyo說：「我哋繼續守住我哋嘅文化產物，除咗傳承之餘就係唔好俾佢萎縮。我覺得做文化係好虛無，但係我哋點樣透過我哋做出嚟嘅成品，令到自己人投放世界嘅時候，可以畀佢哋感受到自豪。」阿弗則說：「唔好俾黑暗支配囉！繼續去搵光明！」
說到最多人談論的走或留，阿弗坦言：「唉，都唔係冇諗㗎！走同唔走都唔係咩問題，去到邊你都要好好面對自己，只要唔俾黑暗支配，你都可以自由自在。」Heyo卻說：「你叫我哋走，唔難㗎，走咋嘛，有乜嘢難度啫，但係你點可以放棄一個出生嘅地方呢？我同呢個地方嘅緣份，我會當自己係一個橋樑，就算我有個機會去第二度，我就係做嗰條搭建嘅橋樑囉！」最後Heyo說：「你唔會就咁想放棄一個你出生嘅地方！」
兩位rapper說：「見利唔可以忘義」；「飲水又要思源」。
作為rapper，最緊要暢所欲言。說起內地的所謂hip hop節目，阿弗說：「佢哋已經有一個主旋律，譬如佢哋關於hip hop嘅節目，紋身唔可以出場，好多嘢唔准講，佢哋已經要定調，由上而下，但其實hip hop係由下而上。」
作為rapper，最緊要自我認同。Heyo說：「我哋填入境表職業，rapper呀？有時會諗呢個問題，但係嗰次入境（台灣金馬獎），我哋的確係以一個rapper身份嚟到呢個地方。」
兩位rapper最愛的歌詞，阿弗說：「最後嗰句，腳下起點（若果你問幾時望到明月，我只係知我腳下係我起點），好多人覺得完喇完喇，唔係，啱啱先開始！」兩人即場rap起來。