阿仙奴多年嚟都好多「險簽」個案，最新一位係周三歐聯連中三元、幫巴黎聖日耳門（PSG）炒巴塞嘅基利安麥巴比。阿仙奴前領隊雲格話當年麥巴比仲踢緊摩納哥嗰陣，兵工廠有機會免費簽入呢位法國前鋒，「當年麥巴比仲踢緊摩納哥，佢考慮續唔續約嗰陣，為咗可以羅致佢，我曾經去過佢屋企，阿仙奴絕對有可能當時免費簽到佢。」當然，最終麥巴比又順利進入險簽陣容。之後雲格又數起自己其他險簽經歷，例如基斯坦奴朗拿度（C朗）已經喺阿仙奴訓練場仲着埋波衫，又例如當初簽法比加斯係想同時簽埋碧基同埋美斯，最終統統進入險簽陣容。但雲爺爺就話，邊隊波都會有咁樣同球星擦身而過嘅經歷。