建制派跟隨中央主旋律大玩文革式文字獄、顏色獄，八方都要跟一跟。點知最幫「黑暴」宣傳嘅竟然係建制派龍頭大黨民建聯，佢哋表面上就搞個籃球衫設計比賽，實際似乎乘機幫攬炒派造勢，呢啲打着紅旗反紅旗嘅行為，該當何罪？
日前特區政府出稿宣傳安心出行「無大台」，民建聯陳恒鑌回覆傳媒時就狠批政府，政府用埋啲「黑暴」措詞係長他人志氣、滅自己威風，兼且幫「黑暴」宣傳。前日輪到工聯會郭偉强鬧政府青少年網站嘅「投考政府工」YouTube頻道，斗膽用黃黑兩色做主色嘅標誌，引起其他人「不必要嘅聯想」，要求政府跟進。
如果上述都踩界，民建聯點會走得甩？青年民建聯喺facebook出po話搞「青民籃球球衣設計比賽」，五款畀大家投票嘅設計當中，第一款叫做「永不言敗的青民籃球隊」，用上黑色做主色、黃色做裝飾，仲唔係幫「黑暴」、「黃屍」宣傳？仲有一款叫「熱血如火」，又係用黃色做主色，再加上橙橙紅紅嘅火燄圖案，嘩，引起民眾不必要嘅聯想，點算呀？八方代郭偉强問㗎咋。
李八方