曾重逾220磅的68歲「靚聲王」張偉文，近年飽受病魔困擾，先後做過腰椎及腦部手術後，現瘦剩140多磅，雙腳無力要靠輪椅代步。張偉文接受《蘋果》訪問時承認去年開始出現失憶、幻覺等症狀，問他今年幾歲？他茫然說：「死啦，1952年出世，減返幾多？」本月初他過馬路時曾連人帶輪椅打觔斗，幸只是腰部痠痛。他表示賈思樂去年尾突然約見面：「佢覺得已經少見，如果唔探吓，我突然間死鬼咗就冇得見。」不過面對生死，他豁達說：「死，唔怕，只要死得唔辛苦，冇問題嘅，我着緊活得好就得。」
張偉文人生只有一個遺憾，就是當年初戀女友懷有四個月身孕時離開他，至今未曾見過親生仔，問兩人有否聯絡？他說：「佢哋喺美國幾好，咁我都安樂。個仔根本同我冇乜交往，見到面我諗都好生疏。」但他表示有給兒子零用︰「佢𠵱家15歲，仲讀緊書，我同嗰個女人夾份照顧佢，每個月萬鬆啲，如果將來真係有需要同仔生活，要重新溝通感情。」張偉文當年未夠20歲初戀，兒子應該48歲左右，問他是否記性差？他說：「差咗，但唔係差到唔記得事、唔認得路，諗得返嘅，唔係話失憶。」
場地提供：十六座車仔麵（太子店）
