8.18非法集結案本周二正式開審，預計審訊期係10日，其中一位被告李卓人為咗紀錄呢10日嘅心路歷程，推出咗「阿人十日審訊十問答」，佢喺首日問答中剖白，其實心理上已經預備咗會入獄，但身體就未準備好。
第一日要回應嘅問題係：審訊前嘅農曆新年點過呢？人哥選擇同屋企人團聚、打吓麻雀，仲話以前覺得團聚唔係啲乜嘢，但今年嘅心情就好唔同，彷彿團聚已經成為奢侈品。
然後阿人就話自己唔似佔中三子之一嘅陳健民咁有紀律，例如為咗令自己身體上有入獄準備，會專登沖凍水涼、食得差啲等，強調自己只係心理上有準備。
至於已經承認明知而參與、組織未經批准集結兩項罪名嘅區諾軒就喺下月22日判刑。佢噚日喺fb話，請大家毋須過份擔心佢，亦好感激曾經幫過佢嘅長輩親友，自言相信未來難以再應徵做講師，所以決定試吓另一樣自己有興趣嘅事——賣酒，除咗同網民分享賣清酒嘅經歷同心得，佢亦會繼續喺Patreon寫文。
李八方