踏入牛年，43歲的陸駿光日前特地到香火鼎盛的文武廟拜神，去年憑ViuTV劇集《太平紋身店》成功入屋的他，希望疫情下keep住好運，事業更上一層樓：「本月為港台劇開工，舊年叫keep住有工開，有嘢做已經好感恩。」原來他是初三赤口出生︰「我細個包拗頸，加上係水瓶座，情緒好似過山車，同人意見又相反，40歲前都幾難搞，不過𠵱家情緒穩定好多，而且年紀大咗冇咁執着，只會分享唔同意見，唔會傷感情。」他說10年前會約中學同學賭通宵︰「由年三十晚開始賭足幾日，最鍾意玩射龍門，貪佢好邪，好易中伏，嗰啲moment係最開心，大家會嗌到癲晒。」
談到在《太平紋身店》跟吳綺莉情深共舞的一幕成為網友熱話，陸駿光說︰「拍呢場戲有驚無險，因為我冇跳舞底，我哋拍之前嗰日至排舞，而且吳綺莉高過我，有啲shot我要抱住佢轉圈，有啲難度，自己好驚hold唔住跌咗佢落嚟。至於網民對呢幕戲咁大反應，我都始料不及，睇返呢場戲自己都笑，我係笑自己舞姿，無論點掀起話題都係好事，作為演員都開心。」
場地提供︰Fine restaurant & lounge
服裝：La esperiencia
化妝及髮型：Kyo Lee
