舖位租金回落，失業率創新高，有人趁機拓展業務，或開舖創業。我想分享節省開舖開支的3個方法。一般租期2至3年死約，再有2年生約，另再訂明約滿後的加租百分比，一般為15%。但現在到處吉舖，就算1年租期或短租都有業主願意，生約年期亦可列明到時根據市場情況再作商議，冇以前限得咁死。租舖有差餉和地租，分別為租值的5%和3%，若然可以傾到租金全包差餉地租連管理費，加加埋埋慳約一成。
過往2年租約一般有1個月免租期，但今時今日2年租約可以傾到3至4個月免租期，甚至更多。每1個月免租期其實佔去租期內的租金若干百分比，若果傾多幾個月免租期，變相減省租金總支出，有行家傾到令租金變相慳近10%的例子比比皆是。
舖位有頂手費，特別是飲食舖，旺市搶舖，頂手費當然無問題。面對今日市差，想及早離場，對於頂手費都是抱住收到就收、收唔到都無計的態度。以一個千呎二線飲食舖月租8萬元為例，2年租金192萬元，一般頂手費由15萬至30萬元不等，已相當於2年總租金支出約10%。
總結，延長免租期、租金包差餉、地租及管理費、豁免頂手費這3項，如果全部傾得成，就已經有機會節省至少30%開舖開支。
小師兄