寫作人職業本能，就是非常八卦。觀人於微，觀人於街角、道左、市井、酒樓食肆廟會……
在觀音廟：有個五十多歲低低地的阿叔，體態笨拙，虔誠拜神，廟祝幫他稟，阿叔道：「我講一句你稟一句：我係XXX，誠心拜觀音，保佑我有工開，日日行好多路，我想行多D路……」——看來是需要奔波行街的勞動活，沒什麼休息，但求日日有路行。當權者離地脫節，借疫以惡法劣策迫害，小市民只求「畀條路行」。
在地鐵車廂：中年女人問身邊阿叔：「借份報紙我瞄吓。」她指：「……黎智英保釋？哦原來唔係，係幫佢打保釋嘅大狀余若薇不能代表出庭？乜咁啱咁蹺set頭5分鐘要隔離14日？咁邪㗎！嗰個羅致光又唔駛？」阿叔笑道：「咁羅公公冇乜大事要做，唔重要吖嘛。」
在車公廟：初三赤口善信大打蛇餅輪候3小時，嘟「安心出行」者少，拒嘟者表示：「冇帶手機。」／「唔識用App。」／「冇電。」／「冇智能。」／「中意登記資料。」／「信唔過政府。」……拜神之嘛，點解要逼人「上路」？
也在車公廟：甲婦：「嗰個乜嘢鄉議局劉仔，幫香港求到支中下籤，話『換醫生為佳』喎。」乙婦：「換乜鬼醫生，班廢柴碼實老細，換病人易過。」
仍在車公廟：老竇教訓阿仔：「求轉運千祈唔好再講『XX死全家』，會拉去坐監㗎。」阿仔回應：「咁祝佢地長命百歲啦。」——長命，但眾叛親離，四肢癱瘓，大小便失禁，在大灣區休養至120歲……由菩薩揸主意啦。
在超市：某師奶向親戚呻：「琴日朝撞到777扮到利是封咁巡區做騷。」人問：「咁有乜嘢作用？」答：「新正頭撞到正！咁猛，要洗眼，咪益咗D賣碌柚葉嘅咯。」
在快餐店：甲女：「咦？乜馮盈盈派利是$100封，仲豪過汪阿姐同無綫？」乙女：「風生水起鋒芒畢露。」甲女：「有錢真係『忍唔住、撳唔住』㗎！」