前𡃁模鄧洢玲（阿旦）近年主力從商做老闆，開按摩店雖受武肺影響，但她毅然再開寵物咖啡店，她早前接受《蘋果》訪問，指搞餐廳最大原因是為她的愛犬。兩年多未有拍拖的阿旦，更堅持對象一定要愛錫動物，她說：「唔鍾意動物唔得㗎。」
鄧洢玲（阿旦）現今36歲狀態仍然甚弗，不時有幕前工作，本來吃喝玩樂等機會又過一日，但她繼多年前開設按摩店後，在疫情下仍堅持搞寵物咖啡店開張，在銅鑼灣禮頓道租下一連兩層舖面。問到她為何如此勇敢，她說：「你估我想嘅咩，之前傾好晒各樣嘢，想走都走唔到。」阿旦指疫情下，政策經常改變確令她最煩惱，不過她稱只要將困難逐個拆解，天下無難事，她說：「每一件事都有困難嘅地方，例如裝修、攞牌照之前都唔識，但可以問啲專業人士朋友，冇乜嘢係解決唔到。」
餐廳二樓空間大，阿旦還定期搞不同主題市集，除了聯絡各種商戶，又邀請藝人嘉賓做直播宣傳，有時工作整日沒有停過。她坦言自己兩年多沒有拍拖，亦沒有人熱烈表達愛意，她說：「我個人本質不嬲都唔吸引呢啲男仔，自己亦冇為意，通常見到人都傾生意。」問到她理想對象是甚麼類型，阿旦說：「首先一定要鍾意動物，如果佢對動物冇愛心，我完全唔會考慮，可能運動型啦，對人處事都要成熟啲。」阿旦養有兩隻狗東東、發發，已經12歲，她指開這間餐廳原因是為了狗狗：「之前去旅行都見到好多可以帶寵物去嘅咖啡室，但喺香港就冇，希望更加多人接受pet friendly呢樣嘢。」
問到有沒有打算何時結婚生仔，阿旦說：「未遇到一個啱嘅人點會計劃呀，我唔會遇到唔啱嘅人都會去結婚，遇到啱嘅唔排除閃婚。」如果對象不喜愛狗狗，只鍾意BB呢？她說：「最好兩樣都鍾意啦，因為我唔會放棄我兩隻狗狗。」阿旦做慣老闆，現時沒有跟任何公司簽約，還自己組織攝影團隊，為客戶推廣產品，出鏡兼度埋宣傳，生意頭腦多多，問她是不是好想賺錢，阿旦說：「𠵱家係為個人滿足感比較大啲，我唔甘於做一個花瓶，諗到就去做，不過有邊個唔想賺錢呢？快啲幫襯我啦。」
場地提供：Chillax
服裝提供：中藝天工閣
