基佬之中我算非常平庸，鹹濕貪靚花心爛玩，幾乎有齊社會認定的標記，但有一樣卻完全與兄弟姐妹背道而馳：不喜歡無端端踢陌生人入會。或者出於一種愛熱鬧的性格吧，這些基友群體生活過得手舞足蹈，仍然嫌社區人口不足，想盡辦法擴展版圖，常常無緣無故發出「阿邊個都係」的神經質嬌嗔，尤其熱衷滾搞娛樂圈名人，譬如美國的湯告魯斯，香港的劉德華，台灣的費玉清，便遭他們慣性冤枉，不管人哋擺明家有賢妻拖兒帶女，統統夾硬拉伕認親認戚。講得再實牙實齒，伊士曼七彩闊銀幕畫面剔透玲瓏，我都不為所動，冒着被責罵手指拗出唔拗入危險，唐突質問「你係咪同佢哋瞓過先」，極力越界保衛直男清白。甚至絕對靠得住的線眼，三番四次報告某已婚專欄作家上健身院不專心做運動只顧眼甘甘𥄫小鮮肉，又話他早年久不久就趁午夜時段人少少去同志浴室覓食，我都為素昧生平的同行仗義執言，除了以「你唔准佢搜集寫作資料咩」開脫，更恥笑探子唔識計數：「橫掂拋個身出嚟，點會揀冇人嘅時間幫襯咁蠢㗎，閣下啲邏輯比歷史武俠小說更加唔通噃。」
所以歲晚收爐，忽然盛傳嗌交部趙姓戰狼疑似實名上同志色情網站瀏覽，洩漏好男色真面目，我當然不信不信不信。作古仔唔該用吓腦啦，堂堂國家高級行政人員，上網𢱑撈改個名容乜易，叫ChairmanMao又好，叫XYZ1234又好，神不知鬼不覺，有乜理由堅持行不改姓坐不改名，搬出人人認得嘅推特賬戶從事觀鳥活動呀？收咗工去滾，都換過件衫先啦，啱唔啱？