有前曼聯拿尼助陣嘅美職聯球隊奧蘭多城喺上禮拜六宣佈，曾效力AC米蘭同車路士等勁旅嘅前巴西國腳柏圖已經以自由身加盟，雙方簽約一年。唔知奧蘭多城係咪特別鍾意巴西兵，佢哋陣中除咗31歲新加盟嘅柏圖外，仲有魯安格哥里奧、祖利亞烏素、安東尼奧卡路士同埋馬菲奧斯巴路素呢幾位巴西兵。而佢哋嘅老前輩巴西名宿卡卡，亦曾喺2014至2017年效力呢支美職聯球隊。柏圖最風光嘅日子係2007至2013年效力AC米蘭嗰陣，佢之後輾轉經歷浪人生涯，去過哥連泰斯、聖保羅、車路士同埋維拉利爾度踢波，更遠赴中國加盟中超嘅天津。2019年再度返家鄉加盟聖保羅，到上年8月解約成為自由身。