西甲皇家馬德里嘅主帥施丹承認，希望有朝一日可以返番法國，並擔任法國國家隊教練。不過佢同時表明呢個只係佢嘅目標，並唔代表自己好快就會「墮馬」下台喎。施丹接受訪問嗰陣時話：「呢個（擔任法國隊主帥）係我嘅目標。當我10年前開始擔任教練時已經講過，呢個係終有一日可能會發生嘅事。但我好享受家吓嘅一切，並將精神集中喺皇馬每日嘅工作。不過你永遠唔會知未來會發生咩事。」其實法國足總早前就講過，希望今年48歲嘅施丹，成為現任法國隊主帥迪甘斯嘅繼任人。施丹今季執教皇馬嘅成績只係平平，又咁啱佢同埋迪甘斯都會喺2022年約滿，令外界相信施丹最快喺下年就轉到份新工。