英冠球會賓福特（圖）上禮拜六宣佈，由聯賽主場對班士利起，球員喺開賽前唔會再單膝下跪，因為佢哋認為咁樣根本宣傳唔到種族平權。球會喺聲明度話：「呢個係經長時間討論後，集體作出嘅決定。我哋由上年6月開始，喺比賽前單膝下跪，但同其他球會嘅球員一樣，我哋唔再相信咁樣仲有影響力。」事實上，上年9月昆士柏流浪球員就已經拒絕過單膝下跪，本身係黑人嘅昆士柏流浪高層費迪南仲批評：「單膝下跪已經成為咗『公關』行為，失去咗種族平權嘅訊息。」而效力英超水晶宮嘅球星韋費特沙夏亦都曾經喺節目度話，單膝下跪嘅行為好瘀，亦唔理解點解單膝下跪，就表達到球員係在乎同支持種族平權。