左丁山一代年長後往長輩家拜年，長輩最鍾意講：「結婚未呀？預祝你快啲拉埋天窗。」結婚後，長輩第一句就係：「祝你添丁發財、連生貴子。」21世紀嘞，對後生一輩講添丁發財，後輩嘅標準回應係：「發財得嘅嘞！」唔提添丁兩個字，難怪十幾年前「家庭計劃指導會」（家計會）好似已經冇晒聲氣，再不宣傳節育，依家家計會究竟有乜可做，相信大部分市民都矇查查。
自由社會宣傳節育，威權國家強力限制生育之年代，已成過去。風水輪流轉，先進地區無不大力宣傳生育好，生育妙，生育有賞，只係美國除外。點解會咁，當然係全世界先進發達國家之生育率連年下降，已到了自然死亡率高於自然生育率，人口淨減少嘅地步。以GDP總值計，中國居世界第二，自然係先進國（唔好按人均GDP），從以前一孩政策至今日放寬，不再打壓多產媽媽，就知道中國雖有14億人，亦開始恐防人口減少，人口老化對經濟增長帶來的衝擊。但中國人民思想雖然受嚴密控制，城市富起來之後，年青人學會西方享受追求消費主義，珍重有錢可以買到的奢華享樂，了解生兒育女的機會成本，在生育上，已再不是聽黨話跟黨走的愛國者。或者中央會將提升生育率至國家安全問題，自小學一年級開始，除咗教國安法、顛覆、分裂、勾結、恐怖主義之外，還要老師日日宣傳生育，生多幾個才是愛國行為。
南韓近十年來人口仍然有增長，但增長率逐年下降，到了2020年，卒之出現負增長，只有27萬5千人出生，死亡人數就有30萬7千人，歷史上首次出現人口減少情況，令南韓政府震驚，立即宣佈大幅提高生育津貼，由2022年起，向零至一歲嬰兒家庭每月提供（港元計）2140元，2025年調高至3570元，產婦有生育補貼14200元；出租公屋方面，增加生育家庭供應額，經第三胎開始，讀大學免交學費。香港又如何？政府統計數字顯示，2020年香港出生49500人，死亡48900人，自然增加600人！單程證人士配額有54750人，只來了22100人，比港人移民20900人多1200人，實際人口增長1800人，創歷史新低，地產商睇到驚，林鄭驚唔驚呢？如果香港每年人口增長千零人，明日大嶼仲有冇需要？政府大力宣傳大灣區機遇無窮，作死是真的，單程證不來，BNO移民增加，香港人口出現負增長！