由名宿變名嘴嘅前曼聯鐵血隊長堅尼，成日批評家吓啲球星玩ig唔專心踢波，但佢最近竟然都開咗自己嘅ig賬戶。近日呢位球場鐵漢開咗ig，仲用咗細個嘅相做頭像，而第一個post就係同隻狗嘅合照，佢仲用「人類最好嘅朋友」嚟形容佢嘅愛犬。令人難以置信嘅係，堅尼開咗ig賬戶後，幾個鐘頭已經有40萬人追蹤佢，但佢就未有跟蹤其他人。米卡李察士、加歷查同埋前隊友高爾都有留言表示驚訝，當中近期同佢一齊講波而變得熟絡嘅李察士仲話：「佢竟然喺度！」，至於另一位評述同行、前阿仙奴射手伊恩胡禮，亦喺自己ig上載咗佢同堅尼過往嘅合照，仲話：「我老友佢終於玩ig喇！」